Bilete

Ny blogg! Ny adresse!

2008-09-30T20:49:00.000+02:00

Etter fleire år med blogger som trufast rasteplass, har eg no avansert til ny, heilt heimelaga blogg.

Nikolai har vore webmaster og eg har vore webdesignar. (Eg vil ha det sånn. Eg vil ikkje ha det sånn. Kan eg få det sånn?)

Herligheita finn de på www.rockenbom.com

Farvel bilete-foglen. Velkommen Rockenbom!

Kveldspiknik på Hovedøya

2008-09-25T20:44:00.001+02:00

Etter jobb reiste vi med piknikkorg og parkteppe til Hovedøya. Der hadde vi ei kveldstom strand heilt for oss sjølve medan sola gjekk ned bak holmane i Oslofjorden.

Siste båt til Vippetangen

2008-09-25T20:40:00.000+02:00

Båtsøndag

2008-09-21T18:04:00.000+02:00

Ida har kjøpt seg seglbåt. Vi gler oss til kvitvin, reker og å dyppe tærne i lunka saltvatn frå Hovedøya neste sommar. Inntil vidare går vi rundt og ser på båtar.

Luftig søndag

2008-09-21T18:03:00.000+02:00

Bittesmå bananer

2008-09-14T19:30:00.000+02:00

Søndagsfrukost med vaffeldessert hos Svein Olav. Desse bananene er verkeleg knøttsmå.

Sinsen-gjengen

2008-09-14T19:26:00.000+02:00

Forsøker å sjå skumle ut på veg til haustutstillinga. Lykkast ikkje så veldig godt.

På bolleslaberas med Karoline

2008-09-14T19:22:00.000+02:00

Loppemarknadlaurdag

2008-09-14T19:17:00.000+02:00

Kaffipause

2008-09-12T20:54:00.000+02:00

Pause i intervju-utskriving. Bolle og kaffi på Åpent bakeri på Sandaker. Hurra for Åpent bakeri på Sandaker.

I nabolaget, fredag formiddag

2008-09-12T20:47:00.000+02:00

Blomsterbutikken på Torshov har lagt ned! Oslos minste og mest innhaldsrike blomsterbutikk, med blomster heilt opp til taket og dampande sveitt atmosfære, med lang kø framfor disken og ein vanvittig hyggeleg og veldig feminin, utanlandsk innehavar som ikkje ein gong heldt stengt i påska eller jula. No er det stengt. Kva kjem i staden? Enda ein eigedomsmeklar? Eller hudpleiesalong, som ser ut til å vere den nye landeplagen? (til min store glede ser eg at Eie eigedomsmeglar har lagt ned kontoret sitt på Sagene. Jippi. Få inn ein skikkelig butikk der!).

Ute på vift

2008-09-12T20:44:00.000+02:00

Sko og skjerf frå Beijing. Fine.

Sperrmüll

2008-09-12T20:41:00.000+02:00

Gjekk forbi dette klassiske sperrmüll-lasset i dag, og tenkte at det kanskje er på tide med ein Storcash-reunion? Synst å hugse at Sperrmüll var ein av dei beste Storcash-låtane. Eller kanskje eg tar feil. Kanskje skal eg finne fram Storcash frå CD-hylla og ta eit gjenhøyr. Kanskje bør eg ta ein øl først.

Hurra!

2008-09-09T16:07:00.000+02:00

Ja! Eg har kjøpt meg nytt objektiv til kameraet mitt. Eit herlig 28 mm fastobjektiv som tar slike herlige bilder. Eg har sjølvsagt sett i gang med å prøve det allereie.

Objektivet har stor blendaropning, og dermed er det lettare å få til dei fine, uskarpe bakgrunnane. Herlig herlig.

Så glad er eg for nytt objektiv:

Stolkupp

2008-09-09T15:42:00.000+02:00

Her om dagen såg eg biletet over i eit blad. I bileteteksten står det å lese at dei grønne stolane heiter "Kilta", og at dei er designa av den finske interiørarkitekten Olli Mannermaa. Vidare står det at stolane vart sett i produksjon i 1955, og at stolen i 1978 vart teken inn på MoMa i New York.
Fine stolar, tenkte eg.
Enda kjekkare er det at stolane ser ut til å vere identiske med arbeidsbordsstolen min, som kan sjåast på biletet under:

Den kjøpte eg på loppemarked her i Oslo for rundt femti kroner, om eg ikkje hugsar feil. Eg syntes den var stilig, og dessutan vanvittig god å sitte i. Etter litt googling, ser eg at stolen er sett i nyproduksjon, og i dag kan kjøpast for fleire tusen kroner. Eg kjenner at stolen blei enda litt betre å sitte i etter at eg fann ut dette.

Fest hos Hedda og Milton

2008-09-07T13:28:00.001+02:00

Luftig

2008-09-05T17:22:00.000+02:00

Kveld på hytta

2008-09-05T17:19:00.000+02:00

Fjelltur

2008-09-03T20:37:00.000+02:00

Kveldssol og utsikt til Aurlandsfjorden.

Pust i bakken

2008-09-03T20:34:00.000+02:00

Tur til Bakka

2008-09-03T20:29:00.000+02:00

Mandag drog vi på biltur til den vesle bygda Bakka i Nærøyfjorden, der litt av slekta kjem frå. Vegen ut dit vert rast ned eit par gangar i året, omtrent, men no har bygdafolket fått seg tunnel. I allefall på delar av vegen.

Gamle hus og bratte fjell. Og ei steintavle frå Unesco som slår fast at kulturlandskapet i Nærøyfjorden er av uvurderleg verdi for menneskeætta. Slå den!

Hyttehelg

2008-09-02T20:36:00.000+02:00

Vi forskøyv helga litt, og leigde oss bil og køyrde til hytta i Aurland på god, gammaldags hyttetur i den siste resten av sommarvarme i fjellet.

Balder vil ikkje heim

2008-09-02T20:31:00.000+02:00

Då vi kom til hytta søndag, skulle mamma, pappa og Balder snart reise heim. Dei blei med på starten av fjellturen, men då dei snudde for å gå heim, ville Balder mykje heller bade og grave etter mus enn å sitte i bilen til Naustdal.

Dermed stakk han like godt av, og lata som han ikkje kunne høyre (noko han temmeleg ofte ikkje kan, forsåvidt).
Eg likar dette bildet, der Balder har stukke av frå mamma og pappa, og sprunge tilbake til meg og Nikolai. Balder er entusiastisk, medan Nikolai peikar at han skal gå tilbake igjen:

Som om hunden forstår peiking.

Høvikodden live

2008-08-24T15:16:00.000+02:00

Trafikkutsikt

2008-08-24T15:12:00.000+02:00

Nikolai et båt-is og ser på folk som spring rundt med paraplyar i regnet.

Ute er det mange fine bilar eg har lyst på. Denne har eg sikla på i lengre tid:

Og ei boble hadde heller ikkje vore så dumt:

Krattutsikt

2008-08-24T15:11:00.000+02:00

Badebasseng? Nokon?

2008-08-20T18:23:00.002+02:00

Sagene bad er til sals igjen. Litt fasadeoppussing og pipefiksing ser ut til å vere det einaste den gamle eigaren har klart å gjere, etter å ha eigd bygget i ganske mange år etterkvart. Salsoppgåva seier ingenting om pris. Synst å hugse at dei som kjøpte det av kommunen då eg flytta til byen fekk det temmeleg billig, mot å pusse opp og opne bassenget for skulen og folk i nabolaget igjen. Men det har dei altså ikkje klart.

Inntil vidare blir det i alle fall lite badeaktivitet. Tøyenbadet held framleis stengt for oppussing, snart eit år på overtid. Og Frognerbadet stengte forrige helg. Ingen sjansar for romantisk bading i regnet der, altså.
Ikkje veit eg kor mykje badet skal seljast for no. Men om nokon har mykje pengar og pågangsmot til overs, vil eg anbefale dei å kjøpe Sagene bad og pusse det opp ein gang for alle. Så kan det bli litt bading i nabolaget igjen!

Tilbake i Oslo!

2008-08-17T18:56:00.000+02:00

No: olivenpai og vaflar. Etterpå: Batman-kino.

Fine trampoline-bilete

2008-08-15T17:15:00.000+02:00

Tok desse bileta til ein artikkel i forrige veke, men bildene blei ikkje brukt. Herlig med trampolinebilete. Dei blir i alle fall ikkje oppstilt.

Rotehaue

2008-08-15T17:13:00.000+02:00

Ein viss forskjell på min og Iris sin arbeidsplass. Eg held til på denne sida av biletet.

Hyttetur hos Sivert

2008-08-10T18:47:00.000+02:00

God stemning.

Ingvill har bursdag!

2008-08-06T21:21:00.000+02:00

Nikolai!

2008-08-06T21:02:00.000+02:00

Jammen kom han på besøk frå Peer Gynt-land mens eg var i Oslo.

Torshov-helg

2008-08-06T20:55:00.000+02:00

Oslo-helg. Fekk ikkje tatt bilete av anna enn leiligheita. Utrulig godt å vere heime med mine eigne ting igjen. Om eit par veker er eg tilbake.

Karoline og Balder

2008-08-03T19:34:00.000+02:00

Bonde på Firda

2008-07-24T13:21:00.000+02:00

Runa avslørt i eit svakt augeblikk med Felleskjøpet-caps på Firda. Tidlegare på dagen sat ho og Iris i kantina og åt microvarma Trondhjems lapskaus iført kvar sin Felleskjøpet-kjeledress.

Lat ettermiddag

2008-07-23T18:29:00.000+02:00

Regnkveld på Færøy

2008-07-23T18:27:00.000+02:00

Inne

2008-07-23T18:24:00.000+02:00

Ute

2008-07-23T18:21:00.000+02:00

Fanga i blitzen

2008-07-23T18:20:00.000+02:00

Krabbe på brygga

2008-07-21T23:36:00.000+02:00

Fire krabbeteiner resulterte i ein fattig fangst på fire krabber, der vi måtte kaste to ut igjen fordi dei var for små. Dermed blei det ei krabbe på meg og ei krabbe på sivert, medan Nikolai, som ikkje er så glad i krabbe, fekk desto meir kvitvin.

Sivert meiner forøvrig at settingen er så picturesk at vi burde selge inn bileta til Maison eller Mat & Vin eller liknande.

Sørebua tidleg kveld

2008-07-21T23:33:00.000+02:00

Rødvin i kopp. Stolar frå Dalsåsen. Garntønne frå ein av dei gamle fiskeribåtane til Besta til Nikolai. Fiskane som bryt overflata er den einaste lyden.

Sein kveld på Sørebua

2008-07-21T23:27:00.000+02:00

Heilt stilt og skikkeleg 80-tallssolnedgang.

På fisketur

2008-07-21T23:24:00.000+02:00

Ut på tur med kaffi og Gjendekjeks. Sivert fekk fire fisk. Eg fekk ein. Den var liten. Desto meir kjeks på meg.

Færøy. Inne. Vin.

2008-07-21T23:22:00.000+02:00

Hos Bilten

2008-07-21T23:14:00.000+02:00

Ti minutt med båt frå Færøy ligg Buskøy, der gamle Bilten held hus med matvarer. Der går ein og hentar melk sjølv på kjølen, og plukkar kanskje med seg ei flanellsskjorte frå 70-talet. Eller kva med litt julepynt?

Mot Færøy

2008-07-15T20:56:00.000+02:00

Helgetur til havet. På ferjekaia på Fure plukka vi opp ein farande fant.

Søndagstur til Selje

2008-06-29T22:57:00.000+02:00

I dag har vi køyrd flyttelasset til Endre til Selje. Desverre gløymde vi å fotografere både flyttinga og Selje, og tok først fram kameraet på ferja Anda-Lote på veg heim igjen. Det einaste beviset vi har for at vi i det heile har vore i Selje, er ei kvittering på ein svinedyr middag på Selje Hotell.

Dog-song

2008-06-29T22:53:00.000+02:00

Eg har besøk av pianokameraten. Han improviserar sangar om Balder. "The dog he loves babies, because they throw him food."

Sjølvutløysereksperimentering

2008-06-29T22:50:00.000+02:00

Naustdal-rom

2008-06-26T18:52:00.000+02:00

Askvollkveld

2008-06-26T18:48:00.000+02:00

Pappa ser på EM. Vi andre drikk rødvin. Mamma sine føter har tydelegvis ein tendens til å dukke opp over alt.

Småhuset

2008-06-22T23:25:00.000+02:00

I hagen i Askvoll ligg eit lite hus vi kallar småhuset. Det har stått tomt så lenge eg kan hugse, og i løpet av åra har eg vore årlege turar innom på leiting etter skattar i form av bøker, sjømannspostkort eller farmors gamle koppar. Etterkvart står det som eit større og større mysterium for meg at ikkje mamma og pappa set i gang med å pusse opp småhuset til ein enkel standard, slik at det går an å bu der.

I helga tok eg med meg helgebesøkande Nikolai på ein liten omvisning, medan eg veiva med armane og demonstrerte korleis eg ville løyst oppussinga. På det minste soverommet tok eg med meg ein liten skatt, den vesle spegelen på biletet under:
Postkort til farmor frå eksotiske stadar:
Attgløymde kleshengarar i eit skap med farfars gamle arbeidsstøvlar:

Eg er optimistisk, og meiner småhuset kan bli eit veldig fint lite krypinn:
Postkort til pappa frå sjømanns-Johan, eksmannen til tanta mi. Bakpå stod det følgande å lese: "Buenos Aires 3/4-60. Hallo Kjell! No sender eg deg ei lita helsing etter gamalt. Eg sit på sjømannskyrkja og skriv. Eg kjem heim i august, og då får du ha båten og fiskereiskapen klar, elles vert det synd i deg, din skoddegauk! Ha det kos, helsing sjørøvaren Johan."
Brudepar. Tjukke slekta?

Askvoll: Inne. Regn.

2008-06-22T23:10:00.000+02:00

Om morgonen: regn på taket, vinden ular rundt hushjørnet, kaldt i rommet, varmt under dyna, lyden av bølgjer som slår mot stranda. Stå opp eller sove?

Om ettermiddagen: etter tur, våte sokkar, lese Julius-boka, ete risengrynsgraut.

Askvoll

2008-06-21T18:44:00.000+02:00

Har kome til Askvoll. Går tur. Det regnar i bøtter og spann. Så er det sol i tre minutt. Så regnar det igjen.

Lørdag i Gamlebyen hos Sara

2008-06-15T14:11:00.000+02:00

Revolver-fredag

2008-06-15T14:05:00.000+02:00

Avslutningsfest for journalistikk

2008-06-13T00:26:00.000+02:00

Ingeborg spelar trombone på operataket

2008-06-08T22:41:00.000+02:00

Masse folk har møtt opp for å sjå:

Gressholmen-søndag

2008-06-08T22:31:00.000+02:00

Musikkfest

2008-06-08T22:25:00.000+02:00

På konsert med Vinyards i Birkelunden. August latar som han er Svein Olav sin son, og pappa Frants ser ikkje ut til å ha noko i mot det. Svein Olav ser derimot litt meir skeptisk ut.

Eg og Ingeborg haustar kompliment for våre årgangs-DBSsyklar.

Pizza og pils i bakgården på Paragrafen

2008-06-08T22:19:00.000+02:00

Varmt

2008-06-07T17:14:00.000+02:00

I løpet av ei veke

2008-06-07T17:12:00.000+02:00

Ved dansens hus

2008-06-03T09:45:00.000+02:00

Ut på biltur

2008-06-01T22:04:00.000+02:00

Nils har fått bestefaren sin gamle bil. Det betyr utflukt. Nils har for anledningen kjøpt seg køyre-sixpence som matchar interiøret i bilen.

Svabergsøndag

2008-06-01T21:59:00.000+02:00

Rockenbomdrinkar

2008-06-01T21:55:00.000+02:00

Fin lørdagskveld med grilling i parken, drinkar og rockenbomplata på platespelaren. God stemning.

Slik lever dei der-utstilling

2008-05-29T20:24:00.000+02:00

I dag tok vi turen til Kunstnarforbundet for å sjå på utstillinga til Lars. Godt jobba, som vanleg. Ein flink mann.

Det store smykket med lyspærer i på biletet under er det Bjarnhild og Asmund i Båtsmia på Færøy som har sveisa saman.

Besøk

2008-05-29T20:21:00.000+02:00

Då eg rydda oppå skapet her om dagen, dukka ein gamal venn opp på besøk:

Han stod for underhaldninga resten av kvelden.

Siverts bursdags/innflyttings/utflyttingsfest

2008-05-25T13:22:00.000+02:00

Då Sivert endeleg hadde bestemt seg for å flytte inn hos Gunnar og Olve, etter å ha budd der på på låns i eitt års tid, kom han rett inn på skrivekunstakademiet i Bergen.

Dermed blei innflyttingsfesten også ein utflyttingsfest, og når han i tillegg har bursdag i desse dagar, blei det sjølvsagt kake. Fin kake.

Og punsj.

Vestlandsrømlingane

2008-05-20T21:25:00.001+02:00

Morgonen 17.mai rømte vi frå snøver i Oslo til solskinn i Sogn og Fjordane. Mamma og pappa følte seg snytt for eit besøk, og troppa like godt opp på flyplassen i Førde med bunad og dress og ein 17.maisløyfepynta Balder.

Han blei glad. Mamma har foreviga det heile:
Tidlegare på dagen hadde Balder gått i 17.maitog i Naustdal for første gong. På tide for den gamle hunden.

Så kom Aksel og henta oss ikledd uniform frå Kystvakta, og køyrde oss til Flekke og Dale. Tøft. Skulle gjerne hatt matrosdresskledd privatsjåfør litt oftare.

Spikarslåing på nasjonaldagen

2008-05-20T21:16:00.000+02:00

Vi kom til Flekke litt utpå ettermiddagen, og fekk ikkje med oss landets truleg aller mest flaggrike 17.mai-tog når det gjeld nasjonalflagg. Heile United World College stiller med flagg frå sine heimland, og det blir ein del. Derimot fekk vi bivåna spikarslåingskonkurranse. Det er seriøse greier, ingen latter der i garden.

17.mai på Transplant

2008-05-20T20:52:00.001+02:00

Kvelden 17.mai reiste vi til Transplant inne i Dale, som vi enda ikkje hadde sett anna enn frå utsida før det stod ferdig i fjor sommar.

Alexandre gir oss ein omvising i restauranten, i materialiteket, det kreative verkstedet og i leiligheiten som han og Birgitta har i den andre enden av bygget. Dei har fått seg badekar framfor vindauget på soverommet! Eg blei reint misunneleg. Fine bilete og meir skriveri om Birgitta og Alexandre, og bilete av badekarsoverommet, finst i Dagbladets omtale av drømmefabrikken.

Transplant må vere ein av dei aller finaste plassane i heile Sogn og Fjordane. Ein finn ikkje slike bygg i Oslo, i allefall ikkje beliggande i strandkanten med fantastisk arkitektur og fantastisk vin.

Drageflyging i Flekke

2008-05-20T20:47:00.000+02:00

I Beijing kjøpte eg denne fine, raude dragen, som slett ikkje er ein drage, men derimot ein fisk. Trass lite vind inst i Flekkefjorden, bestemte vi oss for å prøve den for første gong.

Den lettar. Såvidt. Så dunka den ned i bakken igjen.

Med "Kuling" i kuling

2008-05-20T20:42:00.000+02:00

18.mai lånte vi "Kuling" og drog avgarde frå Flekke mot Færøy, i eit vær som passa namnet på båten godt. Eit par bølger over båten må ein tåle, meiner Nikolai.

Drageflyging i Solund

2008-05-20T20:32:00.001+02:00

Eg, Marta og Nikolai tar med fiskedragen opp på haugen bak huset for å prøve om den kan fly eller ikkje. Der Flekke-vinden var for svak for fisken frå Kina, var Færøy-vinden altfor sterk.

Ingen problem med å få fisken til å fly, men etterkvart løysna heile liminga på dragen, og vi måtte fire dragen ned igjen på bakken. Her måtte sterkare skyts til:

Nikolai veit råd, og henter fram ein drage frå USA som ser ut som ein mini-hang glider.
Den løysna riktignok ikkje i liminga, men flaug derimot så fort fram og tilbake at då den kræsja i eit tre, stod det ei stor sky ut frå treet.

Vi var her

2008-05-20T20:23:00.000+02:00

Etter at Marta fortalte oss at det ligg ei bok ein kan skrive seg inn i når ein går til Selvika, bestemte vi oss for å gå dit. Selvika ligg på den andre sida av øya, og er den lengste turen ein kan gå på Færøy. Å skrive seg inn i bok var heile motivasjonen.

Vi gledde oss veldig til å skrive i bok, men den viste seg å vere vanskeleg å finne. Vi rekna med at den kom til å ligge i ein isboks inni ein steinvarde, slik det pleier å vere med skryteturbøker på Vestlandet. Ingen varde eller isboks i syne. Til slutt fann vi boka inni eit syltetøyglass på ein stein.

Vi er glade. Etter ein kort research-runde, fann vi at regelen var å skrive dato, klokkeslett, kven som har vore på tur, og korleis veret var.

Vi tok oss litt kunstnarisk fridom, og la til at vi hadde funne ein fin trebit:
Men kvar er trebiten?
Her!

Søppel frå havet

2008-05-20T20:13:00.000+02:00

I Selvika gjekk vi på ekspedisjon i fjæra. Det var det mykje forskjellig å finne mellom tang og fjæresteinar. Blant anna fann vi denne bamse-forma:Ein kasse frå Nederland:

Eit bildekk:
Ein kasse som Tine meierier Sør har kasta over bord:

Deodorant:Energidrikkflaske:

Eit plastsete det har rukke å vakse skjell på:

Ein kvit snøjoggar:
Ei Tubby-bøtte:

Selvika

2008-05-20T20:09:00.000+02:00

Hos Besta

2008-05-20T20:05:00.000+02:00

Kveldsbesøk hos Besta. Vi plukka fram bygdeboka frå Hyllestad og snakka om då Besta prylte opp ein gut som var tre år eldre enn ho på skulevegen.

Biletet av barndomsgarden måtte ned frå veggen:

Kveld på Færøy

2008-05-20T20:02:00.000+02:00

Det tar jammen lang tid før det blir mørkt. Eg er fortsatt litt Kina-vill, og synst det er uvant at det ikkje er mørkt klokka sju om kvelden.

Tilbake i Oslo!

2008-05-07T22:57:00.000+02:00

Det første ein gjer tilbake i Oslo er sjølvsagt å gå og ta ein kikk på den nye operaen. Og ete is.

På veg derifrå møtte vi på Askild og kjærasten. Dei hadde også ete is og skulle sjå operaen.

Peking-opera

2008-05-07T22:52:00.000+02:00

Tilbake i Beijing møtte vi Anders og Askild, som stilte opp med skreddersydde dressar og tok oss med på Peking-opera.

Til å kalle seg opera, var det veldig lite synging. Derimot var det mykje akrobatikk og luftslossing. Vi var ikkje spesielt imponerte over plotet, men det er jo sjølvsagt mogleg at ein del av meininga blei borte i oversettinga.

Heldigvis solgte operaen is, og dermed blei det god stemning.

Siste Beijing-middag

2008-05-07T22:42:00.000+02:00

Til middag møtte vi Sandra og Marie, som var nyankome i Beijing etter ein månad hos nomadar i Mongolia, og som var glade over å kunne dusje og ete anna mat enn tørka sauekjøtt igjen.

Vi møtte også ein ung norsk kunstnar med residens i Beijing og kjærasten hans. Til vår store overrasking fekk vi eit eige rom på ein god Taiwan-restaurant i Ghost-street, sjølv om vi ikkje hadde reservert på førehand og var åtte personar til bords.

Øl hos Mao

2008-05-07T22:22:00.000+02:00

Siste Beijing-kveld blei avslutta med øl på Mao Live House, noko så sjeldant som ein kinesisk rockepub.

Der var veggane fulle av innrissa avtrykk frå tidlegare besøkande. Vi følte for å sette vårt eige avtrykk, og Askild tek ansvar og rissar inn "kuk" iført skreddersydd dress.

Zhouzhuang-søndag

2008-05-07T22:04:00.000+02:00

Siste dag i Shanghai drog vi på dagstur til kanalbyen Zhouzhuang. Mange gamle hus og kanalar, og ein heil drøss med turistbutikkar og restaurantar. Nok ein gong har vi vore flinke til å ta turistbilete:Vi gjorde også turistting til å matche bileta, og eg fekk overtalt Hedda til at vi skulle leige ein ro-mann og båt, og ta ein tur på kanalen. Dessverre fekk vi ikkje ein av dei kvinnelege roarane, som sang mens dei rodde.

Fin utsikt frå båten:

Trygt i land igjen. Hedda er glad, ho har funne det lokale bandet på eit tehus:

Vi går forbi ein frisørsalong, der ein mann blir klipt liggande. Kan ikkje skjøne at det kan vere praktisk.

Det lokale tempelet:

Ein fin veranda:Ein gammal båt:

Meny-engrish

2008-05-03T16:18:00.000+02:00

Sand-is med raude bønner. Nam. Eller kva med bartert mango-is? (Forøvrig er det heilt vanleg med bønne-is og erte-is her. Og dei putter tomater i fruktsalaten.)

Kanskje fristar skinkebandwich meir?

Gatelangs på veg heim frå middag

2008-05-03T15:58:00.000+02:00

Kinesarane heng opp klesvasken sin til tørk overalt. Her i Shanghai har dei fleste høghusa hengande klesvask ut av vindauga, sjølv om leiligheitane ligg i 20.etasje. Om ein ikkje passar på når ein går langs fortaua, kan ein fort ende med å kræsje inn i undertøyet til naboen som heng til lufting.
Reklame for det moderne livet:

Desverre hadde vi alt ete middag då vi kom forbi denne plassen (lurer veldig på kva kva delikatesser Mao har å by på. Kalde nudlar? Dumplings?):

Det må ein elefantkonge til for å få kleda sine rensa her i byen:

Lokal ungdom samlast for å traktere rockering utanfor frisøren:

Te-seremoni

2008-05-03T15:25:00.000+02:00

Medan Hedda har vore heime og skrive i dag, har eg vore ute på frifot i byen. Etter ein tur på Shanghai Museum, møtte eg tre kinesiske studentar i parken utanfor. Eg var redd at dei ville selge meg noko, slik dei fleste andre som tar kontakt her i landet har ein tendens til å ville, men det viste seg at dei berre var nysgjerrige og hadde lyst til å praktisere engelsken sin. Etterkvart inviterte ei av dei meg med på kinesisk te-seremoni, som ho meinte at alle turistar bør ha prøvd før dei reiser frå Kina.

Te-seremonien går i hovudsak ut på at ein slags te-meister (øvste biletet) serverer ulike typar te og fortel små anekdoter og historier om kvart slag, medan ho heller teen mellom dusinvis av koppar og kanner og siler.

Den første koppen te skal alltid ofrast til te-guden, som av ein eller anna gud er ein slags frosk (under).

Mykje måne og sol og jord og himmel-terminologi. Og dragar, kinesarane er veldig opptatt av dragar og mytologi og stjerneteikn. Og ikkje minst harmoni. All te er bra for eitt eller anna, anten det er potens eller huda eller håret eller kjærleiken eller vennskap eller vekta. Ein av dei grønne teane skulle føre til mindre rynker under augene. Temmeleg spesifikt.

Men sjølv om det sikkert er veldig mykje humbug med ein slik te-seremoni, skal det seiast at teen var vanvittig god. Jasminteen på biletet under heitte eittelleranna med dragon eyeball, og var visstnok handplukka i eit fjellområde sør i Kina tidleg om morgonen medan blada framleis var fulle av dugg. Deretter blei dei rulla mellom hendene til plukkarane til dei blei små ballar, slik ein ser dei på biletet. Kanskje ein av dei beste teane eg har smakt.

Sjølvsagt måtte ein kjøpe te etterpå, og sjølvsagt var teen dyr, men det var verdt pengane. Lipton blir ikkje heilt det same.

Shanghai Museum

2008-05-03T15:18:00.000+02:00

På gatemarked i gamlebyen

2008-05-02T19:50:00.000+02:00

I gamlebyen

2008-05-02T19:42:00.000+02:00

I dag har det vore heilt vanvittig varmt, og vi gjekk i endelause sirklar og leitte etter ein park vi hadde fått anbefalt, men som vi aldri fann. Søkte i staden tilflukt i smuga i gamlebyen.

Der merka vi ikkje så mykje til det store trykket av kinesiske turistar som resten av Shanghai er prega av denne helga pga 1.mai-feiringa (alle går på shopping, og det er umogleg å få tak i taxi).

Cloud 9

2008-05-02T19:33:00.000+02:00

Vi skal på bar i 87.etasje. Hedda prøver å sjå til toppen av bygget, utan å lukkast heilt.

Høgt ned:

Dry Martini til 100 yuan. Det blei med den eine drinken.

Shanghai engrish

2008-05-02T19:32:00.000+02:00

Shanghai!

2008-04-30T17:05:00.000+02:00

Shanghai: mykje vind og mange bankar. Deilig å sjå litt vestleg arkitektur igjen i dei gamle franske kvartala, der vi vart så sjarmert av ein fin fransk restaurant at vi i dag åt reisas dyraste middag. Vi har igjen vore flinke å ta turistbilete av oss sjølve, denne gong framfor Shanghais skyline, Pudong, tatt frå the Bund. Etter fleire veker i innlandet, er det deilig å kjenne litt sjøluft igjen.

Nanjing engrish

2008-04-29T16:29:00.000+02:00

17 timar til Nanjing

2008-04-29T12:54:00.000+02:00

I Kina er førebuinga til 1.mai-ferien i full gang, noko som betyr at det plutseleg er kjempevanskeleg å få tak i togbillettar. I siste liten fekk vi beskjed om at vi hadde fått sovekupe-billettar frå Beijing til Nanjing, og vi heiv oss på toget. Det viste seg at toget kom til å ta 17 timar. Hedda er positiv, og meiner at det kjem til å bli ein stor opplevelse:

Vi oppdagar at dynene og putene våre kanskje ikkje er dei aller reinaste, men er fulle av mystiske brune flekkar:

Kupeen vår delte vi med to kinesiske menn, som såg heilt vettskremte ut då dei oppdaga at vi skulle bu der med dei. I det vi forlot Beijing, forlot dei kupeen, og fortalte tydelegvis heile resten av toget at det budde to vestlege jenter i kupeen deira, for stadig kom det nye kinesarar bort til døra vår og kikka inn og lo av oss. Dei turde imidlertid ikkje å snakke med oss, og heldt seg unna kupeen i mange timar.

Vi blei etterkvart svoltne, og bestemte oss for å ta turen til restaurantvogna for å få tak i litt mat. Det viste seg å vere enklare sagt enn gjort: restaurantvogna var fullsett, og då vi gjekk inn døra, lo alle kinesarane av oss. Dei har ein tendens til å gjere det. Litt satt ut av at vi var i sentrum av all merksemd og at det openbert ikkje var plass til oss der, kom ein kokk springande og sette oss yttarlegare ut. I staden for å forklare oss at vi eventuelt måtte reservere plass, peikte han berre på ei tralle med plastinnpakka pølser og instant nudles, og nikka og peika enda meir. Det endte med at vi forlot restauranten med kvar vår boks med tørka nudlar, som vi måtte blande ut med kokande vatn i kupeen vår. Det hittil kjedelegaste måltidet i Kina fekk vi altså på toget:

Vi begynner å kjede oss. Ein tv som sender kinesisk reklame non stop står og skurrar og støyar oppe på veggen, og det går ikkje an å skru den av. Hedda tar på seg duken frå nakkestøttene og poserar som kinesisk bondekone:
Ikkje så mykje å sjå på utanfor vindauget heller, landskapet er heilt flatt, og vekslar mellom dyrka åkermarker og større og mindre byar som ser bortimot forlatt ut. Her og der synast store bilete av Mao og byportar prega med raude stjerner, men toget køyrer så fort at motiva er borte får eg får tatt fram kameraet. På åkrane finst nokre få traktorar og ein og annan hest, men for det meste står folk og jobbar med hakke og spade på dei endelause jordene:

Vi sovnar litt:

Etter at det har blitt mørkt, tek dei to kinesiske romkameratane våre mot til seg, og vågar seg tilbake til kupeen armert med ein pose full av ølboksar. Dei deler resolutt ut øl og begynner å skåle. Det viser seg at den eine har ei dotter på 20 år som studerer engelsk, og han kan nokre få ord. Dei er nysgjerrige på kvar Norge er, og på kor mange søsken vi har. Elles går det mest i ganbei (skål), medan dei styrtar ned den eine øllen etter den andre. Målet var openbert å skjenke oss fulle, men kinesarane er ikkje så vane med å drikke, og heller ikkje så flinke til det. Dei styrtar ølboksane rett ned, noko som gjorde at dei ikkje heldt på så lenge før dei bestemte seg for å gå og legge seg.

Lønn for strevet

2008-04-29T12:34:00.000+02:00

Då vi forlot Beijing blei vi fortalt at det ikkje kom til å vere noko problem å skaffe seg togbillettar frå Nanjing til Shanghai, ettersom det visstnok skal gå ekspresstog på den strekninga heile tida. Då vi gjekk ned i resepsjonen på hostellet her i Nanjing i dag tidleg og fekk vite av resepsjonisten at det var umogleg å skaffe billettar til Shanghai i morra, blei vi både oppgitt og overraska. Vi var ikkje heilt sikre på om det var resepsjonisten sin manglande engelsk (vi: "when does the train leave nanjing?" ho: "yes") eller faktisk mangel på billettar som gjorde at ho gav oss den informasjonen ho gjorde. Imidlertid meinte ho at det kunne vere mogleg å få tak i bussbillettar, men ho kunne ikkje ringe og sjekke. I staden gav ho oss adressa til eit billettkontor der ingen snakka engelsk, og som vi ikkje fann fram til før vi sette oss i ein taxi og fekk den til å køyre oss dit. Der viste det seg at den einaste luka som selde bussbillettar var stengt i eit par timar, og dei andre lukene kunne berre selge togbillettar, og ikkje bussbillettar (slik er det i Kina. i ein liten butikk kan det jobbe seks personar, og den som har ansvar for å taste inn tall på kassa, kan ikkje hjelpe ein med å putte ting opp i posen, ettersom det er ein annan person sitt ansvar). Vi stod litt rådville og lurte på om vi blei nødt til å bli i Nanjing for alltid, då ei hyggeleg dame kom bort og sa " I speak little english. need help?", og dermed svarte på alle våre bønner om å få snakke med ein einaste person som forstod kva vi sa. Ho meinte vi ikkje kunne stole på å få tak i billettar på det billettkontoret vi var på, men losa oss derimot gjennom byens t-banesystem, der ho betalte for våre t-banebillettar og fortalte villig vekk om sonen på 12 år som lærte ho engelsk, om korleis ho likte å bu i nanjing, om kvar ho jobba og om sommartemperaturane i Kina. Vi endte opp på Beijings dyraste hotell, der ho viste oss inn til billettkontoret som sikkert eigentleg var forbeholdt hotellets betalande gjestar, og ikkje reisande fantar frå eit billig hostell. Sidan ingen spurte om vi faktisk budde der, ordna to hyggelege engelsk-talande damer der plutseleg billettar til oss på første klasse på eit tog til Shanghai i morra tidleg, og vi fekk billettane utlevert på minuttet, alt for omlag 100 kroner. Vi ville betale dama som hadde vore så hyggeleg og brukt ein halvtime av si eiga tid og betalt for oss med sine eigne pengar, men før vi fekk sukk for oss bukka og smilte og vinka ho, og sprang for å rekke jobben sin.

For å feire at vi kom til å kome oss vidare i dette noko kompliserte landet, gjekk vi sporenstreks på hotellets Häagen Dazs-isrestaurant, og bestilte sjokoladeis som var dyrare enn ein trerettersmiddag med øl på ein vanleg kinesisk restaurant. Etter å ha brukt heile formiddagen på å streve og mase fram og tilbake, følte vi at vi fortjente litt luksus.

Glade over å ha fått billettar OG is:MMM sjokolade. Det er nesten umogleg å få tak i det i Kina, så vi nyter kvar bit: